Home · L’histoire· 'Utnaghe Ti

'Utnaghe Ti

Wheni dakelh ts'inli 'uda ndoh 'Utnaghe ti (grease trail) hoh nuts'udelh inle, 'ankw'usyaz sih 6000 khi 'aowh naowdezut Alexander McKenzie butsohda da hoh ti nuts'udelh. Alexander McKenzie 'en 1793 hoh sih soo udechoo ndoh ti whenya, nelhdakelh 'en ti whehinelhtan. Ndoh 'Utnaghe ti 'et wheni dakelh ts'inli hoh ti nuts'uzdel 'et ts'iyaowh hoh nek'oh nuwhuz'a, yeztli 'ink'ez nuts’ulhbas chah k'oh, yeztli benuhudelh chah k'oh, nelhdakelh ts'iyaowh hoh ti nuhuwhulh’a. Alexander McKenzie 'en soo 'udechoo nedo ndoh Canada ninya. Niz deh 'azdeh hainya. Nelhdakelh 'en Alexander McKenzie 'ink'ez huyulhnudelh bulh whehinelhtan, Pacific ocean yun nuhulghas hoh, bulh whehinelhtan gwa took'oh ts'un 'uhuja. Njan 'Utnaghe Ti 'et ndoh Fraser River ntsun hainli 'et took'uduk 'ankw'usyaz lhulcho Prince George whuts'un 'et whedit'ih, 'ink'ez Bella Coola whuts'un ti whewha'a.

'Ankw'usyaz sih 120 'uda ts'uwhet'i inle nduhoont'oh whuzdla, buloh lhghohyaz whuzdla. 'Utnaghe ti njan Bella Coola whuts'un 279 nduhooldzoh, lhtak’alt’i dzen nduhooldzoh yeztli beh whuz ladutanyalh. Yun nilgaih hoonint'i t'eh, ankw'usyaz sih nat-lanezyi 'o'un 'lhuk’i dzen sih 'ut'ant'ilh whuz lhadutanyalh. Soo ‘udint’oh 'ink'ez ts'iyai bendutandzulh ts'iyaowh unt'i 'et k'an zeh ti k'edonya.

Ndi 'i Doreen Patrick yuk'une'uzguz

K'anyaz ndunah Alexander McKenzie nde Bella Coola teyalh wheinelhtan 'en Kama ts'utni. Ndunah Kama 'en Ndazkoh huwhut'en Matilda Boyd 'ink'ez Lashawy Alec 'en hubua'tsoocho 'ink'ez 'o'un hubu’atsoo cho ho 'ant'e. Nelhdakelh 'en 'ahoolhyez ti lhelhtunuhudelh ho 'ant'e yeztli 'ink'ez nuts’ulhbas ‘i beh nye 'Ulkatcho whuz lhunats'uwudulh 'ink'ez yeztli natulghul nduhoont’oh hubuts'un nunahudulh inle. 'Udak'ez da suzki dune 'en 13 hoh uzulh, whuz ti yeztli be whehandel, 'ilhuz Bella Coola ts'ih nuhuzdel. Njan Bella Coola whutsoh 'et dzulh tse danch'ul, ti dube hoondotyaz, yeztli zeh ba nduhooldot ‘et ti wheho’a. Untsun whe 'uts'ulhkwus dube wheonujut, yeztli beh ntsun tanyalh t’eh 'et 'onus wheonujut. Nelhdakelh 'ahoolhyez ti nuhudelh inle, 'utsunsugi, mai, 'ink'ez luwus, ‘i 'Utnaghe bulh lhk’elhanuts’ule inle. Ndi 'Utnaghe 'i sbootihghe 'i 'uhuyulhni. Ndi sbootihghe 'i wheni lamuk ts'ilh'i 'ink'ez 'ukulh be ghats'ughuna inle.